كۆنفرانسی ساڵانه‌ی قوتابییانی فاكه‌ڵتی په‌روه‌رده‌

Students Annual Conference Faculty Of Education

ئه‌مڕۆ دوو شه‌ممه‌ رێكه‌وتی 19/5/2014 له‌ هۆڵی كۆنفرانسی فاكه‌ڵتی په‌روه‌رده‌ و به‌ ئاماده‌بوونی نوێنه‌ری سه‌رۆكایه‌تی زانكۆی سۆران و راگرانی فاكه‌ڵتییه‌كانی زانكۆ و ژماره‌یه‌كی به‌رچاو له‌ مامۆستاو قوتابییانی فاكه‌ڵتی په‌روه‌رده‌، كۆنفرانسی ساڵانه‌ی قوتابییان به‌ڕێوه‌ چوو.

له‌ سه‌ره‌تای رێوره‌سمه‌كه‌دا به‌ڕێز"د. هیوا بالیسانی"راگری فاكه‌ڵتی په‌روه‌رده‌ وتارێكی پێشكه‌ش كرد و هیوای خواست كه‌ ئه‌م كاره‌ ببێته‌ هۆی هاندانی قوتابییان، تا به‌ گوڕ و تێنێكی زیاتره‌وه‌ به‌ هاوكاری مامۆستاكانییان، توێژینه‌وه‌ی زانستی به‌رهه‌م بێنن.

پاشان به‌ڕێز"د. یادگار ره‌سووڵ"یاریده‌ده‌ری سه‌رۆكی زانكۆ بۆ كارووباری قوتابییان به‌ نوێنه‌رایه‌تی سه‌رۆكی زانكۆ وته‌یه‌كی پێشكه‌ش كرد. "د. یادگار" له‌ وته‌كانیدا وێڕای ده‌ستخۆشی له‌ ده‌سته‌ی ئه‌كادیمی و به‌ڕێوه‌به‌رانی كارگێڕی فاكه‌ڵتی په‌روه‌رده‌، هیوای سه‌ركه‌وتنی بۆ خواستن و ئاماژه‌ی بۆ ئه‌وه‌ كرد كه‌ ئه‌م كاره‌ به‌رده‌وامه‌ی فاكه‌ڵتی په‌روه‌رده‌، له‌ راستای به‌دیهێنانی ستراتیژی زانستیی زانكۆیه‌، كه‌ ئه‌ویش بریتییه‌ له‌ به‌ره‌وپێش بردنی ئاستی به‌دیهێنانی توێژینه‌وه‌ی زانستی و گه‌یاندنی زانكۆ به‌ ئاستی زانكۆ به‌ناوبانگه‌كانی جیهان . هه‌ر له‌ درێژه‌ی وته‌كانیدا پشتیوانی ته‌واوی سه‌رۆكایه‌تی زانكۆشی بۆهه‌رجۆره‌ كارێكی له‌م چه‌شنه‌ ده‌ربڕی.

له‌ به‌شێكی دیكه‌ی كاری كۆنفرانسدا، "د. هاوڕی مه‌نسوور به‌گ" بابه‌تێكی تایبه‌ت به‌ نووسینی توێژینه‌وه‌ی زانستی له‌ ئاستی جیهانیدا پێشكه‌ش كرد و تیشكی خسته‌ سه‌ر ئاستی زانكۆی سۆران و چه‌ندایه‌تی و چۆنایه‌تی بڵاو كردنه‌وه‌ی توێژینه‌وه‌ی زانستی له‌ لایه‌ن توێژه‌رانی ئه‌م زانكۆیه‌وه‌. له‌ به‌شێكی وته‌كانیدا "د. هاوڕێ" باسی له‌وه‌ كرد كه‌ ئه‌گه‌رچی ئه‌و هه‌ل و مه‌رجه‌ به‌ به‌راورد له‌ گه‌ڵ دنیا و زانكۆ به‌ناوبانگه‌كانی دنیادا زۆر به‌رچاو نییه‌، به‌ڵام به‌ سه‌رنجدان له‌ ته‌مه‌نی كه‌می زانكۆ و به‌ به‌راورد له‌ گه‌ڵ زۆر زانكۆی دیكه‌، گه‌لێك هیوا به‌خشه‌.

له‌ به‌شێكی دیكه‌ی كاره‌كانی كۆنفرانسدا، قوتابییانی به‌شه‌كانی: زانستی گشتی، كوردی و وه‌رزش، به‌ شێوه‌ی پێشكه‌ش كردنی پرێزنته‌یشن و به‌ هاوكاری مامۆستایانی سه‌رپه‌رشتیارییان، توێژینه‌وه‌كانییان بۆ ئاماده‌بووان، شیكردنه‌وه‌.

له‌ دوا به‌شی كاری كۆنفرانس و دوای ته‌واو بوونی بابه‌ته‌كان، سه‌ركه‌وتووه‌كان كه‌ له‌ لایه‌ن لیژنه‌یه‌كی زانستییه‌وه‌ دیاری كرابوون، خه‌ڵات كران. هه‌ر دوای پێشكه‌ش كردنی خه‌ڵاته‌كان"د. هاوڕی مه‌نسوور به‌گ" یاریده‌ده‌ری سه‌رۆكی زانكۆ بۆ كاروباری زانستی، به‌ وته‌یه‌ك كۆتایی به‌ كۆنفرانسه‌كه‌ هێنا. ناوبراو له‌ وته‌ كورته‌كه‌یدا خۆشحاڵی و سه‌رسامی خۆی بۆ زیره‌كی و ئازایه‌تی و باوه‌ڕبه‌خۆبوونی قوتابییانی فاكه‌ڵتی په‌روه‌رده‌، له‌ ره‌وتی پێشكه‌ش كردنی باسه‌كانیاندا ده‌ربڕی و هیوای خواست كه‌ فاكه‌ڵتییه‌كانی تریش هاوشێوه‌ی فاكه‌ڵتی په‌روه‌رده‌، ئه‌م كاره‌ ئه‌نجام بده‌ن.

شایه‌نی باسه‌ زۆربه‌ی به‌شدارانی ئه‌م كۆنفرانسه‌، ئه‌م كاره‌ی فاكه‌ڵتی په‌روه‌رده‌یان به‌ كارێكی شیاو و زانستی له‌ قه‌ڵه‌مداو پێیان وابوو كه‌ ئه‌مه‌ هه‌نگاوێكی باشه‌ بۆ به‌رزكردنه‌وه‌ی ئاستی زانستی و باوه‌ڕ به‌خۆ بوونی قوتابییان، له‌ هه‌مبه‌ر ئه‌نجامدانی توێژینه‌وه‌ی زانست.

راپۆرت و وێنه‌: رۆژهات مه‌هدی