سەنتەری تاقیكردنه‌وه‌ى ( Pearson)لە زانكۆی سۆران كرایەوە

Signing Contract For Pearson Centre

 

رۆژی دووشەممە رێكەوتی 3-3-2014، لە رێوڕسمێكی شایستەدا و بە ئامادەبوونی پەرلەمانتارانی دەڤەری سۆران و بەڕێوەبەرایەتییەكانی دەڤەری سۆران و ستافی ئەكادیمی زانكۆی سۆران و نوێنەری(Pearson)، لە هۆڵی كۆنفڕانسی كەمپی نوێی زانكۆ، بە فەرمی سەنتەری تاقیكردنەوەی زمانی ئینگلیزی "Pearson" كرایەوە. لە دەسپێكی رێوڕەسمەكەدا و دوای بەخێرهێنانی ئامادەبووان، "د. موسڵیح مستەفا" سەرۆكی زانكۆی سۆران وتەیەكی پێشكەش كرد. لە وتەكەیاندا بەڕێزیان ئاماژەی بە گرنگی و بایەخی كردنەوەی سەنتەری پێرسن كرد و رایگەیاند :"ئەوە دەسكەوتێكی دیكەی ئەكادیمیەو بایەخێكی زۆری هەیە، ئەمەش دەچێتە چوارچێوەی هەوڵدان بۆ بەهێزكردنی ژێرخانی زانستی لە هەرێمی كوردستان و بەدەستهێنانی دەستكەوتی زانستی نایاب و كەم وێنە لەسەر ئاستی عێراق و كوردستان". لای خۆشیانەوە نوێنەری سەنتەری "پێرسن" بەڕێز "ماتیۆ لەمپكین" (بەرپرسی پەرەپێَدان و ماركتینگی پێرسن لە دنیا، كە سەنتەرەكەی لە لەندەنە) لە وتەیەكدا دڵخۆشی دەربڕی كە بەشێوەیەكی نایاب و بە كواڵیتییەكی بەرز ئەم سەنتەرە لە زانكۆی سۆران كراوەتەوە و زۆر بە گەرمی سوپاسی سەرۆكی زانكۆ و بە گشتی بەڕێوەبەرایەتی زانكۆ كرد، بۆ بە ئەنجام گەیاندنی ئەم پڕۆژەیە. بەم جۆرەش هەلێكی نوێ و خێرا بۆ قوتابیانی كوردستان دەڕەخسێ، كە دوای بە دەست هێنانی ئەم بڕوانامەیە دەتوانن لە زانكۆكانی جیهان درێژە بە خوێندن بدەن. هەر لە چوار چێوەی مەڕاسیمی كردنەوەی سەنتەری پێرسن، "عەباس غەزالی" ئەندامی پەرلەمانی كوردستان بەناوی نووسینگەی سۆرانی پەرلەمانی كوردستان، وتەیەكی پێشكەشكرد و پیرۆزبایى له‌ كردنه‌وه‌ى ئه‌م سه‌نته‌ره‌ كرد و به‌ ده‌سكه‌وتێكى گةوره‌ى ئه‌كادیمى له‌ قه‌ڵه‌م دا.  قوتابیانی كورد لەمەودوا بە ئاسانی دەتوانن لە دەرفەتێكی كەمدا، چارەنووسی خۆیان لە توانستی زمانی ئینگلیزی تاقی بكەنەوە و زووتر دوای كاروبارەكانی تایبەت بە درێژەدان بە خوێندن لە دەرەوەی وڵات، بكەون. شایانى باسه‌ تاقیكردنەوەی پێرسن تاقیكردنەوەیەكی باوەڕپَێكراوی جیهانییە و لە زۆربەی هەرە زۆری زانكۆكانی جیهاندا باوەڕی پێدەكرێت و وەك تاقیكردنەوەیەكی ستاندارد چاوی لێدەكرێ.. زانكۆی سۆران بەم دەسكەوتەی دەروازەیەكی نوێی بە رووی جیهاندا كردەوە و دەسكەوتێكی نوێی خستە سەر دەسكەوتەكانی ریفۆرمی خوێندن و گەشەپێدانی خوێندنی باڵا لە هەرێمی كوردستان.

 لە داهاتوویەكی نزیكدا وردەكارییەكانی تایبەت بە چۆنیەتی بەشداریكردن و ئەنجامدانی تاقیكردنەوە لەم سەنتەرەدا، دەخەینە بەرچاو.
راپۆرت: توانا تەها
وێنە: عەبدوڵڵا ئەحمەد