رێز له‌ توێژه‌ران و مامۆستایانی سه‌ركه‌وتووی پڕۆسه‌ی دڵنیایی جۆری گیرا

Sli

 

رۆژی چوارشه‌ممه‌ رێكه‌وتی ٢٧/٢/٢٠١٩، به‌ ئاماده‌بوونی به‌ڕێزان "د. موسڵح مسته‌فا" سه‌رۆكی زانكۆی سۆران، یاریده‌ده‌رانی سه‌رۆكی زانكۆ، راگری فاكه‌ڵتییه‌كان و ژماره‌یه‌كی به‌رچاو مامۆستا، له‌ رێوڕه‌سمێكی تایبه‌تدا، رێز له‌ مامۆستایانی سه‌ركه‌وتووی پڕۆسه‌ی دڵنیایی جۆری و هه‌روه‌ها توێژه‌رانی زانكۆ گیرا.

له‌ سه‌ره‌تای كۆبوونه‌وه‌كه‌ و دوای به‌خێرهێنانی ئاماده‌بووان، به‌ڕێز "د. محه‌ممه‌د عه‌لی" به‌رێوه‌به‌ری په‌یوه‌ندییه‌ ئه‌كادیمییه‌كان، له‌ پرێزنته‌یشنێكدا، تیشكی خسته‌ سه‌ر پڕۆسه‌ی دڵنیایی جۆری و ریزبه‌ندی نیشتمانی زانكۆكانی كوردستان و، به‌ زانیاری و داتای ورد، بۆ ئاماده‌بووانی روونكرده‌وه‌. له‌ به‌شێك له‌ قسه‌كانیدا، به‌رێزیان زۆر سپاسی هه‌موو مامۆستا و ستافی زانكۆی كرد، كه‌ رۆڵی به‌رچاویان هه‌بووه‌ له‌ به‌دستهێنانی سه‌ركه‌وتنه‌ به‌رده‌وامه‌كانی زانكۆدا.

دواتر به‌ڕێز سه‌رۆكی زانكۆ وته‌یه‌كی پیشكه‌ش به‌ ئاماده‌بووان كرد. له‌ وته‌كه‌یاندا به‌ڕێزیان خۆشحاڵی خۆی بۆ كۆبوونه‌وه‌كه‌ ده‌ربڕی و ئه‌وه‌ی به‌ به‌شێكی سه‌ره‌كی له‌ ئه‌ركی زانكۆ لێكدایه‌وه‌، كه‌ پێزانینی هه‌بێ بۆ مامۆستایان و توێژه‌رانی خۆی.

به‌ڕێز سه‌رۆكی زانكۆ له‌ به‌شێكی دیكه‌ی وته‌كانیدا، ئاماژه‌ی به‌وه‌ كرد، كه‌ ئه‌گه‌رچی چه‌ند ره‌گه‌زێكی سه‌ره‌كی له‌ زانكۆ هه‌ن و هه‌موویان ته‌واوكه‌ری یه‌كترین، به‌ڵام مامۆستایان خاوه‌نی پێگه‌ی سه‌ره‌كین له‌و ناوه‌دا و، ده‌توانن رۆڵی یه‌كلاكه‌ره‌وه‌یان هه‌بێ، له‌ به‌ره‌وپێشبردنی زانكۆ و پێگه‌یاندنی قوتابییان. هه‌روه‌ها تیشكیشی خسته‌ سه‌ر ئه‌وه‌ی، كه‌ له‌ سه‌ركه‌وتنه‌كانی زانكۆدا، پشكی شێر بۆ مامۆستایان و توێژه‌رانه‌.

له‌ به‌شێكی دیكه‌ی وته‌كانیدا، زۆر سپاسی مامۆستایانی كرد كه‌ سه‌ره‌ڕای هه‌موو قه‌یرانه‌كان، هیچكاتێك نه‌یانهێشتووه‌ پڕۆسه‌ی زانستی زانكۆ رابوه‌ستێ.

دوای پێشكه‌شكردنی وتاره‌كه‌یان، به‌ڕێز سه‌رۆكی زانكۆ، سوپاس و پێزانینی سه‌رۆكایه‌تی زانكۆی به‌خشییه‌ مامۆستایان و توێژه‌رانی زانكۆ.