وه‌زیری خوێندنی باڵا، سوپاس و ده‌ستخۆشی ئاڕاسته‌ی زانكۆی سۆران ده‌كات

Dr Yusuf Goran

 

ئه‌مڕۆ دووشه‌ممه‌ رێكه‌وتی ١٥/٥/٢٠١٧، به‌ڕێز "د. یوسف گۆران" وه‌زیری خوێندنی باڵاو توێژینه‌وه‌ی زانستی، له‌ راگه‌یاندنێكدا، به‌ بۆنه‌ی به‌ستن و به‌ڕێوه‌بردنی سێیه‌مین كۆنفرانسی قوتابی زانكۆی سۆران، سوپاس و ده‌ستخۆشی ئاڕاسته‌ی سه‌رۆكایه‌تی زانكۆی سۆران و به‌ڕێوه‌به‌رانی كۆنفرانس كرد.

له‌م سوپاسنامه‌یه‌دا، كه‌ ناوه‌رۆكه‌كه‌ی له‌ ماڵپه‌ڕی وه‌زاره‌تی خوێندنی باڵا بڵاوكراوه‌ته‌وه‌، له‌ به‌شێكیدا وێڕای ده‌ستخۆشی و سوپاس له‌ به‌ڕێوه‌به‌رانی كۆنفرانسه‌كه‌، ئاماژه‌ به‌وه‌ دراوه‌، كه‌ "گرنگیدان بە توێژی خوێندکاران و قوتابیان بەدەستپێشخەریەکی گرنگی دادەنێین، چونکە نابێ کۆنفرانس و بابەتە زانستیەکان تەنها تایبەت بکرێن بە مامۆستایان و توێژەران، بەڵکو دەبێ زانکۆ هاوشانی ڕۆڵ و بەشداری مامۆستایان و توێژەران لە کۆنفرانس و گفتوگۆ زانستیەکان، دەبێ بەهەمان شێوە بایەخ بەخوێندکاران بدەن و، دەرفەتی بەشداری کاریان پێ بدەن."

پێویسته‌ بگوترێ، كه‌ ئه‌مڕۆ دوو شه‌ممه‌ رێكه‌وتی ١٥/٥/٢٠١٧ سێیه‌مین كۆنفرانسی قوتابی له‌ زانكۆی سۆران ده‌ستی پێكرد و وا بڕیاره‌ له‌ ماوه‌ی دوو رۆژدا، نێزیك به‌ سی توێژینه‌وه‌، له‌ لایه‌ن قوتابییانه‌وه‌ پێشكه‌ش بكرێن.