ده‌قی وتاره‌كه‌ی به‌ڕێز "د. موسڵح مسته‌فا" له‌ كۆنفڕانسی زانستی زانكۆی سۆران و زانكۆی سینتڕاڵ فلۆریدا، لە وڵاتی ئەمریكا

10940435 622772467851466 1085564643265779165 N

 

ئامادەبووانی هێژا…

 لە ناخی دڵمەوە بەخێرهاتنێكی گەرمتان لێدەكەم. زۆربەتان لە ڕێگای دوورەوە هاتوون بۆ بەشداربوون لەم كۆنفڕانسە ناوازەیە كە لە نێوان زانكۆی سۆران و زانكۆی سینتڕاڵ فلۆریدا بەستراوە لەژێر ناوی "ڕوانین لە دەرەوە بۆ ناوەوە: كۆنفڕانسی دیراساتی كوردی".

شایەنی باسە ئەوە یەكەمین كۆنفڕانسە كە لە لایەن زانكۆیەكی كوردستان و ئەمریكا لە ولاتەیەكگرتووەكانی ئەمریكا دەبەسترێت. من دڵنیاتان دەكەمەوە كە سەفەرەكەتان بێهوودە نابێت و بیروڕاكانی ئەم كۆنفڕانسە سەرنجتان بۆ چەمك و ڕەهەندی زانستی ڕاكێش دەكات. سیمینارەكانی ئەم كۆنفڕانسە گشتگیرییەو تاوتوێی چەندین بابەتی كۆمەڵایەتی و ڕامیاری و ئابووری و مێژووی و زمانەوانی و كولتووری دەكەن.

بایەخدان بە لێكۆلینەوەی ئەكادیمیی لە سەر كوردو كوردستان و كولتوور و مێژووی دانیشتوانی كوردستان، بریتیە لەو هەنگاوە گرنگانەی لەم دوایەدا توێژەران لە هەموو دونیا بایەخیان پێداوە. ئەم بایەخدانە تەنها لە ڕوانگەی ڕامیارییەوە سەرچاوەی نەگرتووە. بەڵكو بەر لە هەڵگیرسانی قەیرانی ڕامیاری خۆی خزاندبووە نێو ئاسمانی توێژینەوەی زانستی لە زانكو و مەڵبەندە ئەكادیمییەكانی ئەورووپاو ئەمریكا. ئێستا هەرێمی كوردستان لانەی پێكەوە ژیانەو حكومەتی هەرێمیش هەنگاوی گەورەی هاوێشتووە بۆ چەسپاندنی دیموكراسی و ئاسایش.

 ئەمڕۆ حكومەتی هەرێم سەرچاوەی دابینكردنی وڵاتێكی خۆشگوزەرانە بۆ خەڵكەكەی. لەگەڵ ئەو هەنگاوانە، هەرێم قۆناغ بە قۆناغ، لە ڕووی ئەكادیمیی و زانستیەوە، پەیوەندییەكانی لەگەڵ زانكۆیە بەناوبانگەكانی دونیا پتەوتر دەكات.

خۆشەویستان…

 زانكۆی سۆران، لە ڕیزی پێشەوەی ئەو پەیوەندییە ئەكادیمیانەیە كە دەكرێت وەكو مۆدیلێكی سەركەوتوو نەك هەر لە كوردستان و عێڕاق سەیر بكرێت. بەڵكو ئەم ئەزموونەمان بێ‌ وێنەیە لە هەموو ناوچەی ڕۆژهەڵاتی ناوەڕاست، زانكۆی سۆران كەوتۆتە یەكێك لە ناوچە هەرە جوان و سەرنج ڕاكێشەكانی كوردستان. كە نزیكەی دوو سەعات لە "هەولێر"ی پایتەختی هەرێمی كوردستان دوورە، ئەو شارەی یەكێكە لە كۆنترین شوێنەوارو پێگەی مێژووی مرۆڤایەتی. كە لەكاتی ئێستا زانكۆی سۆران خاوەنی پێنج فاكەڵتییە ئەوانیش بریتین لەمانە: فاكەڵتیی زانست، فاكەڵتیی ئەندازیاری، فاكەڵتیی یاسا، فاكەڵتیی ئاداب، فاكەڵتیی پەروەردە. كەمپسی زانكۆی سۆران كاری جدی بۆ كراوەو هێدی هێدی باڵەخانەكانمان دروست دەكرێن و ماڵی قوتابیانیشمان لەسەر تەواوبووندایە. پەیوەندییەكانمان لەگەڵ زانكۆیە بەناوبانگەكانی جیهان ڕوو لە زۆربوونە.

 لە داهاتووێكی نزیك، زانكۆی سۆران دەبێتە پێشەنگی ڕەوتی زانست و مەعریفە لە كوردستان و عێڕاق.

بەڕێزان…

 هەر لەم بۆنەیەدا، بە پێویستی دەزانم ئاماژە بە دیاردەیەك و ڕووداوێكی گرنگ بكەم كە ئێستا لە كوردستان ڕوودەدەن.

یەكەم: بەهۆی سەقامگیری و ئازادی و یەكسانی كۆمەڵایەتییەوە، كوردستان ئێستا مەڵبەندی لەخۆگرتنی زیاتر لە ملیۆن و نیوێك پەناهندەیە، ئەوانەی لە دەست زوڵم و ستەم بە هۆی جیاوازی ئایینی و كەمایەتی و سیاسییەوە رایانكردووە، ئێستا لە كوردستان مافەكانیان پارێزراوەو حكومەتی هەرێمیش بەرگریان لێدەكات و شوسَنی حەوانەوەیان بۆ دابین دەكات.

 دووەم: پێشمەرگە لە هەموو سەنگەرێكەوە بەرگری لە خاكی پیرۆزی كوردستان دەكات و لە تەواوی سنووری كوردستان "داعش"ی تێكشكاندووە. ئەو شەڕەی پێشمەرگە نەك شەڕێكە بۆ بەرگری لە كوردستان، بەڵكو لە پێناو ئازادی مرۆڤە دژی دواكەوتووی و كۆیلایەتی كە داعش دەیەوێت لە دونیای ڕۆژهەڵاتی ناوەڕاست بەرپای بكات، ئەمڕۆ پێشمەرگە لە جیاتی هەموو دونیا بەرگری لە سەروەری و مافی مرۆڤ دەكات و داستانی قارەمانێتی و سەرسورهێنەر بۆ مێژوو تۆمار دەكات. بەدڵنیاییەوە شایستەی ئەوپەڕی ڕێزو وەفایە.

بەڕێزان ئامادەبوونی كۆنفڕانس…

 لە دوا وتەمدا، ئومێدەوارین كاتێكی خۆش بەسەر ببەن لەم كۆنفڕانسە، هیوادارین لە داهاتوویەكی نزیك لە سۆران و كوردستان بتان بینینەوە.

زانكۆی سینتڕاڵ فلۆریدا – ئەمریكا

 27-1-2015