وتاری د. موسڵیح مسته‌فا له‌ راگه‌یاندنی پڕۆژه‌ی فێركرای زمانی كوردی بۆ ئاخێوه‌رانی بیانی

46467815 258074278212937 8201081348375445504 N

 

ئاماده‌بووانی به‌ڕێز

میوانانی هێژا

هه‌موولایه‌كتان به‌خێر بێن

خۆشحاڵین كه‌ ئه‌مڕۆ له‌م كۆبوونه‌وه‌ گرنگه‌دا له‌گه‌ڵمانن. كۆبوونه‌وه‌یه‌ك كه‌ پڕۆژه‌یه‌كی ستراتیژی تێدا راده‌گه‌یه‌ندرێ و په‌یوه‌سته‌ به‌ بابه‌تێكی هه‌ستیار له‌ په‌یوه‌ندی نێوان مرۆڤه‌كان. ئه‌م پڕۆژه‌یه‌، كه‌ په‌یوه‌سته‌ به‌ فێركاری زمانی كوردی بۆ ئاخێوه‌رانی بیانی و، له‌ لایه‌ن سه‌نته‌ری هه‌ندرێن بۆ زمان و توێژینه‌وه‌ی كولتووری ئاماده‌كراوه‌، به‌شێكه‌ له‌ ستراتیژێكی فراوانتر، كه‌ له‌ روانگه‌ی زانكۆ سه‌باره‌ت به‌ زمان، وه‌كو به‌هێزترین ئامرازی پێوه‌ندی و لێكگه‌یشتنی نێوان مرۆڤه‌كان، هه‌مانه‌.  هه‌ر له‌ سه‌ره‌تاوه‌ زۆر هه‌ستیار بووین سه‌باره‌ت به‌م بابه‌ته‌ و زۆر كارمان له‌م پێناوه‌دا كردووه‌. هه‌میشه‌ وامان هه‌ستكردووه‌، یه‌كێك له‌ باشترین رێگاكان بۆ به‌دیهێنانی گفتوگۆیه‌كی بنیاتنه‌ر و په‌ره‌پێدان به‌ توانای بیركردنه‌وه‌ و فراوانكردنی ئاسۆكانی روانین و به‌دیهێنانی گه‌شه‌یه‌كی ئه‌رێنی به‌رده‌وام، فێربوونی زمانه‌ جیاوازه‌كانه‌.

ئه‌م پڕۆژه‌یه، جگه‌ له‌و ره‌هه‌نده‌ مرۆییه‌ی كه‌ هه‌یه‌تی، ره‌هه‌ندێكیشی هه‌یه‌ كه‌ په‌یوه‌سته‌ به‌ كۆی كێشه‌ی كورد و هه‌لومه‌رجی ئێستای وڵاته‌كه‌مانه‌وه‌. ئه‌مه‌ هه‌وڵێكی سیسته‌ماتیك و جه‌وهه‌رییه‌، تا له‌مه‌ولا ئه‌وانه‌ی دێنه‌ ئه‌م وڵاته‌، له‌ رێگه‌یه‌كی ئاسان و ئه‌كادیمییه‌وه‌، بتوانن فیری زمانی كوردی بن و، دواجار راسته‌وخۆ قوڵایی كێشه‌ی كورد و نه‌هامه‌تییه‌كانی سه‌ر ئه‌م میلله‌ته‌ و حه‌قیقه‌ت و راستی بابه‌ته‌كان بزانن، نه‌ك ئه‌وه‌ی كه‌ له‌ ده‌ستی دووه‌م وسێیه‌مه‌وه‌ پێیان بگات. ئێمه‌ باوه‌ڕمان وایه‌، كه‌ دواجار تێگه‌یشتن له‌ كورد و كوردستان، پێویستی به‌ زانینێكی بنه‌ڕه‌تی زمانی كوردی‌ هه‌یه‌. ئه‌مه‌ جگه‌ له‌وه‌ی، له‌و هه‌لومه‌رجه‌ی كه‌ ئێستا له‌ كوردستاندا هه‌یه‌ و له‌به‌رده‌م گه‌شه‌یه‌كی به‌رفراوانی گه‌شتیاری، پیشه‌سازی و بازرگارنیدایه‌، ئه‌م پڕۆژه‌یه‌ هه‌م ده‌توانێ ئاسانكاری بكا بۆ ئه‌و ده‌یان هه‌زار هێزی كاره‌ بیانییه‌ی، كه‌ له‌ كۆمه‌ڵگاكه‌مان هه‌یه‌، تا دوای ئاوێته‌كردنیان به‌ كۆمه‌ڵگا، راده‌ی به‌رهه‌مهێنان و گه‌شه‌، ببه‌نه‌ سه‌رێ، هه‌م رێگا بۆ هێزی خۆماڵییش خۆش بكات، كه‌ چیدیكه‌ زمان نه‌بێته‌ رێگر له‌ په‌سه‌ندكردنیان له‌ كۆمپانیا و دامه‌زراوه‌ بیانییه‌كان، چونكه‌ هه‌ندێكجار له‌به‌ر ئه‌وه‌ی كۆمپانیا بیانییه‌كان شاره‌زایی زمانی كوردیان نییه‌، بۆیه‌ هێزی كاری خۆماڵی به‌ ئه‌سته‌م ده‌توانێ ببێته‌ به‌شێك لێیان. ئه‌مه‌ جگه‌ له‌ فراوانكردنی مه‌ودای ئاوێته‌بوونی كولتووریش. له‌ لایه‌كی تریشه‌وه‌، هه‌ر ئه‌م پرۆژه‌یه‌ ده‌توانێ یارمه‌تیده‌رێكی گرنگی ئه‌و قوتابییه‌ بیانییانه‌ بێ، كه‌ له‌ چوارچێوه‌ی پڕۆژه‌ی سكۆڵه‌رشیپی كوردی وه‌زاره‌تی خوێندنی باڵادا، له‌ كوردستان ده‌خوێنن.

له‌ كۆتاییدا، وێڕای ده‌ستخۆشی له‌ سه‌نته‌ری هه‌ندرێن و ئاماده‌كارانی ئه‌م پڕۆژه‌ ناوازه‌یه‌، هیوادارم په‌ره‌ی زیاتری پێ بدرێ، تا به‌ باشترین شێوه‌ بتوانین رێگاكانی فێربوونی زمانی كوردی بۆ ئه‌وانه‌ی كه‌ زمانی كوردی نازانن و دێنه‌ وڵاته‌كه‌مان، هه‌موار بكه‌ین.

سوپاس بۆ ئاماده‌بوون و گوێگرتنتان