پێویستە مرۆڤ بە کۆی سیستەمی فکری و کرداری خۆیدا بچێتەوە

Dr.muslih

 

دەقی ئەو وتارەی کە لە دیداری ساڵانەی زانکۆی سۆران(کوردستان دوای کۆڤید١٩: کاریگەری و لێکەوتەکانی)، بە شێوەی ئۆنلاین، لە رێکەوتی ١٢/٥/٢٠٢٠، پێشکەشمکرد.

ئاماده‌بووانی به‌ڕێز

توێژه‌ران و به‌شداربووانی خۆشه‌ویست

هه‌موو لایه‌كتان به‌خیر بێن بۆ دیداری ساڵانه‌ی زانكۆی سۆران (كوردستان دوای كۆڤید 19: كاریگه‌ری و لێكه‌وته‌كانی). دیدارێكی جیاواز له‌ كات و ساتێكی هەستیاردا. خۆشحاڵین كه ئەم دیدارە لە کاتێک ئەنجام دەدەین، کە کوردستان بە یەکدەستی حکومەت و خەڵکەکەی، توانیویەتی لە تەوژمی یەکەمی ڤایرۆسەکە کەمترین زیانی گیانی لەسەر ئاستی دونیا هەبێت. بەڕێوەچوونی دیدارەکە بە ئۆنلاین هێمای ئەوەیە کە رەنگە تا ماوەیەکی درێژ، وەکو ئەوەی ڕاپۆرتە جیهانییەکانی بواری تەندرووستی باسی دەکەن، پێویستیمان بەوە هەبێ ئەو مۆدێلە نوێیانەی خۆپارێزی، لە دوورکەوتنەوە لە گردبوونەوەی زۆر و باشتر ڕاگرتنی پاکوخاوێنی، بەردەوامی پێبدەین. هیوای تەندرووستی باش و سەلامەتی بۆ هەمووتان دەخوازم.

ئەزموونی کوردستان لە نێو کۆڤید ١٩ زۆر وانەی پێگوتین. ئەو ئەزموونە زیاتر ڕوونیکردەوە، کە پێکەوەکارکردنی حکومەت و خەڵک گرنگە بۆ تێپەڕاندنی هەموو قەیران و کێشەیەک، جا ئاست و قەبارەی کێشەکە هەرچەند بێت. لەسەر ئاستی دونیاش، ڤایرۆسی کۆڤید ١٩ بیری خستینەوە کە بایەخدانی زیاتر بە توێژینەوە و زانست و زانکۆ و زاناکان و تەرخانکردنی بودجەی زۆر بۆ بواری توێژینەوە و داهێنان، پێویستن. بۆ هەمووان سەلمێندرا، کە وێڕای پێشکەوتنە گەورەکانی بواری تەکنۆلۆژیا و پیشەسازی و پەیوەندی و دەرمان و پەتاناسی، هێشتا ڤایرۆسێک دەتوانێت شارە گەورەکانی وەکو شەنگهای و نیویۆرک و لەندەن و پاریس لەوپەڕی جەنجاڵییەوە ڕەوانەی ماڵەوە بکات؛ هێشتا ڤایرۆسێک دەتوانێت وڵاتانی گەورەی ئابوری و سیاسی و تەکنۆلۆژی وەکو چین و ئەمریکا و بەریتانیا، توشی سەرسوڕمان بکات. ئەمە نمونەیەکە کە هێشتا پێگەی زانست و دۆزینەوە لە دۆخی ئاوادا دێتەوە پێش پێگەی سێکتەر و بوارەکانی دیکە.

کەواتە ئه‌زموونی كۆڤید نۆزده‌، جگە لە ترس و مۆتەکە، له‌ هه‌ناوی خۆشیدا هه‌ڵگری په‌یامێكی گرنگ بوو. په‌یامێك، كه‌ پێویسته‌ مرۆڤ سه‌رله‌نوێ، له‌ هه‌موو ره‌هه‌نده‌كانه‌وه، به‌ كۆی سیسته‌می فكری و کرداری خۆیدا بچێته‌وه‌. هه‌ر له‌ ته‌ندرووستییه‌وه‌ بگره‌ تا ئابووری و خواناسی و سیاسه‌ت و..هتد. هه‌ر ئه‌مه‌یه‌ وای كردووه‌ كه‌ زۆرێك له‌ خاوه‌ن رایان باس له‌ جیهانی پێش و پاش كۆرۆنا بكه‌ن. كۆڤید 19 پێی نیشانداین پێشكه‌وتنه‌ پزیشكییه‌كان چه‌نده‌ سه‌رسوڕهێنه‌ر بن، ئابووری چه‌نده‌ گه‌شاوه‌ و به‌هێز بێ، سیاسه‌ت چه‌نده‌ سه‌قامگیر بێ و ده‌روونه‌كان چه‌نده‌ جێگیر بن، هێشتا مه‌ترسییه‌كان به‌ ئاستێكی زۆر به‌رز له‌ بۆسه‌دان بۆیان. ئه‌وه‌نده‌ به‌سه‌ بزانین یه‌كێك له‌ كاریگه‌رترین رێگرییه‌كانی بڵاوبوونه‌وه‌ی كۆڤید 19، له‌سه‌ر بنه‌مای رای پزیشكان و ته‌نانه‌ت رێكخراوی ته‌ندرووستی جیهانیش، كۆمه‌ڵێك رێكاری زۆر ساده‌ و ئیلتزامێكی ئه‌خلاقی ساده‌ بوو، كه‌ پێویست بوو له‌ لایه‌ن مرۆڤه‌كانه‌وه‌ هه‌بێ بۆ ره‌چاوكردنیان. هه‌ر له‌سه‌ر بنه‌مای ئه‌م تێگه‌یشتنه‌ش بوو، كه‌ پێمان وابوو، پێویسته‌ دیداری ئه‌مساڵی زانكۆی سۆران ته‌رخان بكه‌ین بۆ ئه‌م بابه‌ته‌ و تیشكخستنه‌ سه‌ر سێ ره‌هه‌ندی گرنگی سیاسی و ئابووری و ته‌ندرووستی، كه‌ راسته‌وخۆ كاریگه‌رییه‌كه‌یان له‌سه‌ر كۆمه‌ڵگه‌كه‌مان هه‌ستپێده‌كه‌ین. به‌مشێوه‌یه‌ ئێمه‌ ته‌نیا بیر له‌ خۆگونجاندن ناكه‌ینه‌وه‌، به‌ڵكو له‌ هه‌ناوی كۆرۆنا و له‌ نزیكترین مه‌وداكانیدا كه‌ هێشتا گه‌رمی مه‌ترسییه‌كه‌ی ماوه‌، هزری داهێنه‌رانه‌ ده‌خه‌ینه‌ كار، تا به‌ لێكدانه‌وه‌ی ره‌هه‌نده‌ جیاوازه‌كانی، ئاسۆیه‌كی روون بخوڵقێنین و، بناغه‌ی ژیانێكی سه‌قامگیرتر و كه‌م گرێ تر له‌ رووی سیاسی، ئابووری، ته‌ندرووستی، ده‌روونی و كۆمه‌ڵایه‌تیی، دابمه‌زرێنین.

سوپاس بۆ هه‌موو به‌شدارانی پانێله‌كان و، هه‌روه‌ها بۆ هه‌موو ئه‌و به‌ڕێزانه‌ش، كه‌ ئه‌ركی به ئاكام گه‌یاندنی ئه‌م دیداره‌یان له‌ ئه‌ستۆ بوو..

سوپاس بۆ گوێگرتنتان و هەر سەلامەت بن