کوردی 
English 
ڕۆژی چوارشەممە رێکەوتی ۳/٤/۲٠۱۹، بەڕێز "د. موسڵح مستەفا" سەرۆکی زانکۆی سۆران پێشوازی لە بەڕێوەبەر و ئەندامانی لیژنەی ڕاوێژکاری دەستنووسخانەی زانکۆی سۆران کرد.
لە کۆبوونەوەیەکدا بە ئامادەبوونی بەڕێز "د.نەهرۆ زاگرۆس" یاریدەدەری سەرۆکی زانکۆ بۆ کارووباری زانستی، باس لە کار و چالاکی و پڕۆژەکانی دەستنووسخانە کراو، ئامادەکارییەکانی یەکەمین کۆنفرانسی عەللامە مەلا عەبدورەحمانی گەورەی پێنجوێن، قسەیان لەسەرکرا، کە بڕیارە لە ۱٥ و ۱٦ی حوزەیرانی ئەمساڵ لە قەزای پێنجوێن بەڕێوەبچێت.
هەر لە درێژەی کۆبوونەوەکەدا، بەڕێوەبەر و ئەندامانی دەستنووسخانەی زانکۆ، پلان و ستراتیژیی شەش مانگی داهاتووی دەستنووسخانە و ئامادەکاریی دووەمین کۆنفرانسی زانستیی خۆیان خستەبەردەم سەرۆکایەتی زانکۆ و سوپاسی سەرۆکی زانکۆیان کرد بۆ پاڵپشتیی بەردەوامی پڕۆژەکانی دەستنووسخانە لە ناوەوە و دەرەوەی وڵات.
لای خۆشیەوە سەرۆکی زانکۆ دەستخۆشی لە بەڕێوەبەر و ستافی ڕاوێژکاریی دەستنووسخانە کرد و کار و چالاکییە مەیدانییەکان و، هەروەها پڕۆژە دەگمەنەکانی دەستنووسخانەی زانکۆی لە کۆکردنەوە و هێنانەوەی دەستنووسی زانایانی کورد تا دەگاتە ساغکردنەوەیان و ئامادەکاریی کۆنفرانسەکان، بەرز نرخاند و پشتگیریی سەرۆکایەتیی زانکۆی بۆ دووپاتکردنەوە.
زانكۆی سۆران له كۆتاییه‌كانی ساڵی 2009 به فه‌رمانی حكومه‌تی هه‌رێمی كوردستان دامه‌زرا. زانكۆی سۆران هه‌ر له سه‌ره‌تای دامه‌زرانییه‌وه، به دنیابینییه‌كی كراوه و به سه‌رنج چڕ كردنه‌وه له سه‌ر كواڵیتی زانست و په‌ره‌پێدانی پێوه‌ندی نێوده‌وڵه‌تی، هه‌وڵی داوه نموونه‌یه‌كی نوێ له ئه‌زموونی دامه‌زراوه‌ی ئه‌كادیمی پێشكه‌ش بكات.