له‌ وۆركشۆپێكدا كاریگه‌ری وه‌رزش له‌ سه‌ر كۆرۆنا تاوتوێ كرا

Sli

 

‎رۆژی یه‌كشه‌ممه‌ ڕێكه‌وتی ١٩/٤/٢٠٢٠ کاتژمێر ٤:٠٠ی پاش نیوه‌ڕۆ، به‌ به‌شداری ژماره‌یه‌کی بەرچاو له‌ مامۆستایان و قوتابییانی زانكۆ‌ی سۆران، به‌شی وه‌رزشی فاكه‌ڵتیی په‌روه‌رده‌، وۆركشۆپێكی به‌ ناونیشانی ( فایروس كورونا وتأثیرها علی الانسان والریاچیین ) ئەنجامدا.

‎ وۆرکشۆپەکە كه‌ بە ڤیدیۆ کۆنفرانس لە ڕێگای پلاتفۆرمی زووم بەڕێوەچوو، دوو بابه‌تی تێدا پێشكه‌شكران. له‌ بابه‌تی یەکەمدا بەڕێز  "پ. ی. د. ممتاز احمد امین" بابەتێکی بە ناونیشانی (فایروس كورونا و تأثیرها علی الانسان) پێشکەشکرد.

‎به‌ڕێزیان له‌ باسه‌كه‌یاندا، وێڕای پێناسەكردنی ڤایرۆسه‌كه‌ و باسكردنی چۆنیه‌تی سه‌رهه‌ڵدان و بڵاوبوونه‌وه‌ی، په‌رژایه‌ سه‌ر كاریگه‌رییه‌كانی بۆ سه‌ر ژیانی مرۆڤ به‌ شێوه‌یه‌كی گشتی و ئه‌و گۆڕانكارییه‌ی كه‌ له‌ رۆتینی ژیانی مرۆڤه‌كاندا به‌دیهێناوه‌.

بابه‌تی دووەم لە لایەن به‌ڕێز "م.ی هێرش یوسف" به‌ ناونیشانی ( وەرزشكردن و ڤایرۆسی كۆڕۆنا ) پێشكه‌شكرا، كه‌ تێیدا بە گشتی باس لە وەرزش کرا و دواتر بە وردی تیشکخرایە سەر جۆر و سوده‌كانی وەرزش له‌ سه‌رده‌می كۆڕۆنادا، كه‌ چۆن لەم کاتەدا بتواندرێت له‌ ڕێگای وەرزشه‌وه‌ بەرگری لەش بەهێز بکرێت و چۆن چارەسەری ناڕێكی سوڕی ژیان و کاریگەرییە دەروونییەکان بكه‌ین، كه‌ له‌ ئه‌نجامی ته‌شه‌نه‌كردنی ئه‌م ڤایرۆسه‌وه‌ به‌دیهاتوون.

‎له‌ كۆتاییدا، له‌ لایه‌ن ئاماده‌بووانی وۆرکشۆپەکەوە تاوتوێی بابەتەکە کراو، چەند پرسیارێک لەبارەی بابەتی وۆرکشۆپەکە ئاڕاستەی مامۆستایان کران، كه‌ ئەوانیش به‌ وردی وەڵامی پرسیارەکانیان دایه‌وه‌.