سیمینارێکی هاوبه‌شی به‌شی زمانی عه‌ره‌بی و به‌شی كۆمه‌ڵناسی سەبارەت بە زمان و کۆمەڵگا

Sli

 

له‌ چوارچێوه‌ی چالاكییه‌ زانستییەکانیاندا، هه‌ردوو به‌شی زمانی عه‌ره‌بی و كۆمه‌ڵناسی، سیمینارێكی هاوبه‌شیان به ‌ناونیشانی (په‌یوه‌ندی زمان و كۆمه‌ڵگه‌) ئه‌نجامدا.

سیمیناره‌كه‌ ڕۆژی پێنج شه‌ممه‌، ١٤-٥-٢٠٢٠، كاتژمێر ١٠ ی شه‌و به‌سه‌رپه‌رشتی به‌ڕێز "د. كارمه‌ند عبدالله"  ڕاگری فاكه‌ڵتی ئاداب و بە بەشداری ژمارەیەکی بەرچاو لە مامۆستایان، به‌ڕێوه‌چوو.

سه‌ره‌تا به‌ڕیز ڕاگری فاكه‌ڵتی سوپاسی هه‌ردوو به‌شی زمانی عه‌ره‌بی و كۆمه‌ڵناسی كرد و به‌خێرهاتنی به‌شداربووانی كرد و، ئومێدی خواست به‌رده‌وامی به‌و دیدار و  چالاكییانه‌ بدرێت.

سیمیناره‌كه‌ دوو ته‌وه‌رهی‌ له‌خۆگرتبوو:

له‌ ته‌وه‌ره‌ی یه‌كه‌مدا، "د. سعید شمس" مامۆستا له‌به‌شی كۆمه‌ڵناسی، بابه‌تێكی پێشكه‌شكرد به‌ ناونیشانی (زمانه‌وانی و تێڕوانینه‌ كۆمه‌ڵناسییه‌كان)، تێیدا باسی له‌ تێڕوانینی كۆمه‌ڵناسی په‌روه‌رده‌یی بۆ زمان كرد و تیشكی خسته‌ سه‌ر هه‌وڵی زانایانی كۆمه‌ڵناس و زمانه‌وان له‌و بواره‌دا.

له‌ ته‌وه‌ری دووه‌میشدا، "د. ڕێبوار عبدالله" مامۆستا له‌ بەشی زمانی عه‌ره‌بی، بابه‌تێكی پێشكه‌شكرد به‌ ناونیشانی (زمان و كۆمه‌ڵگه‌)، کە تێیدا باسی له‌ زانستی زمان و بواركانی كرد. هه‌روه‌ها چۆنیه‌تی په‌یوه‌ندی زمان و كۆمه‌ڵگه‌ی ڕوونكرده‌وه‌ و ئاماژه‌ی به‌ بۆچونی زانایانی عه‌ره‌ب و بیانی له‌سه‌ر شێوازی ئه‌و په‌یوه‌ندییه‌ كرد. دواتر ئاماژه‌ی به‌ سه‌رهه‌ڵدان و گه‌شه‌سه‌ندنی زمانناسی كۆمه‌ڵایه‌تی كرد و تیشكی خسته‌سه‌ر جیاوازی هه‌ردوو چه‌مكی (علم اللغة‌ الاجتماعی) و ( علم الاجتماع اللغوی).

سیمیناره‌كه‌ به‌ شێوه‌ی ئۆنلاین و له‌ ڕێی زووم میتینگه‌وه‌ به‌ڕێوه‌چوو و، جگە لە مامۆستایانی هه‌ردوو به‌شی عەرەبی و کۆمەڵناسی و بەشەکانی تری فاكه‌‌ڵتی ئاداب، چه‌ندین مامۆستا له‌ زانكۆ جیاوازه‌كانی كوردستانه‌وه‌ به‌شداربوون. به‌شداربووان له‌ كۆتاییدا پرسیاره‌كانی خۆیان خستنه‌ڕوو و ئاڵوگۆڕی سه‌رنج و تێبینیه‌كانیان كرد.

 

97087558 1181410052203974 4083360227330621440 n