دوای ماوه‌یه‌كی زۆر شیعر نووسین و كاركردن له‌ بواری ئه‌ده‌ب، قوتابی زانكۆی سۆران "هیوا مه‌لا ئاده‌م" كتێبێكی شیعری بڵاوكرده‌وه‌.

"هیوا"ی شاعیری گه‌نج، كه‌ ده‌رچووی به‌شی زمانی كوردی فاكه‌ڵتی ئادابه‌، سه‌باره‌ت به‌ كتێبه‌ شیعرییه‌كه‌ی، له‌ لێدوانێكدا بۆ راگه‌یاندنی زانكۆ گوتی،" كتێبه‌كه‌م به‌ ناونیشانی "فانۆسی شـکاو" ه‌و له‌ دوو به‌شی سه‌ره‌كی پێكهاتووه‌، كه‌ له‌ژێر ناونیشانی "بوغز و ئه‌وین"، ناسێندراون.

هیوا له‌ درێژه‌دا سه‌باره‌ت به‌ هه‌ریه‌ك له‌و به‌شانه‌ گوتی، "بەشی بوغز، ئەو شیعرانە لەخۆدەگرێت، کە زادەی زەبری بێئومێدیی و تێکشکانن، وەختێک کە تێکڕای هێزە ترادسیۆنە سیاسیی، کۆمەڵایەتیی و ئایینییەکان دەست دەنێنە بینەقاقای خەونەکانت و وەک کیسەڵێکی بەسەر پشتدا وەرگەڕاو، شیعر دەبێتە پەلەقاژە و چنگەکڕێی مانەوەو ئیدامەدان،بەهیوای هەستانەوە!"

سه‌باره‌ت به‌ به‌شی "ئه‌وین" یش، گوتی،" بەشێکی ئەو شیعرە دڵدارییە سادەو خاوێنانەی ڕۆژگاری خۆخواردنەوە و شەوگاری نووسینەوەی خەون و فرمێسکن، کە نزیکەی ۱٦ساڵ بەسەر نووسینیاندا ڕابراوەو دوازدە ساڵێکیش لەوەی پێش، لە ترسی گەورەکانم(باوک..بـرا...کەس و کار و پیاو ماقوڵان و ئەهلی مزگەوت و عیبادەت!)، بەناوی خوازراوی"بێدار قەسرەیی" و لە نامیلکەیەکدا بەناوی(هەناسەیەک بەر لـەمردن)لەسەر ئەرکی "فەرهەنگخانەی چۆمان"چاپ و بڵاوکرانەوە و، دواجار لەم کتێبەدا بێ دەسکاری کردن و بەئەمانەتەوە، وەک جگەرگۆشەی خۆم،هێناومنەتەوە سەر ناوی خۆم.

هه‌ر سه‌باره‌ت به‌ شیعره‌كانی به‌شی "ئه‌وین" هیوا له‌ درێژه‌دا گوتی، بەشێکی تریشیان كۆمه‌ڵه‌ شیعرێكی لیریکی"غنائی"بڵاونەکراوەن و بەرهەمی ئەوچەند ساڵەی بێدەنگیمن.

پێویسته‌ بگوترێ، کتێبێکە لە دووتوێی ٥۰۰لاپەڕەی قەبارە مامناوەند، لەلایەن کتێبفرۆشی"مێخەک"چاپ و بڵاودەکرێتەوە و، یەکەم وێستگەی پەخشـکردنیشی لە(پێشانگای نێـودەوڵەتی کتێب- سلێمانی)دەبێت.